Wah you know bout pressure?

Wah you know bout presha?

White squall tek ova yuh mouth like toothpaste

Fe get a likkle wuk come een’ like a rat race

Wah you know bout presha? Up inna yuh resorts an’ hotel suites

Wah you know bout walkin in d one shoes n watch it bruk off likkle likkle, piece by piece?

Yuh eva affe carry wata yet? wrap piece a claat pan yuh head fe rest di bucket pan?

Yuh eva affe use di hardcover book ova di coal stove an’ fan?

Gas, light, wata is precious sumin

Nuff a we cyah afford none!

Wah you know bout climbing mango tree fe dinner an’ people dog a run we dung

Wah you know presha?

Fe stand up an’ look inna yuh pickney dem eye fe an’ hear dem tell yuh say dem hungry

Yuh think a dat hot? Mek yuh know inna heart yuh nuh have nuttin fe gi dem!

Dis a di cycle fe smaddy weh poor, not less fortunate…me mean poor!

Poor mean me nuh have it!… it nuh mean we nuh have enough..it mean di pot empty!

Cupboard have cobweb!

Don’t come pretend like yuh know bout presha! Jus’ because yuh need me fe pretty up me finga wid INK

Wah yuh know bout presha! Wah yuh know bout me!

Mine yuh bruk yuh foot! How yuh fe wear heels come a bush?

Me cyah lift yuh up so yuh try nobadda drop cause from bout 3 years me a suffa wid a bad back

Take sumin for it? Me tell yuh say me cyah feed me pickney dem an’ me fe tek money spend p-an me back?

Me nuh lucky like unu enuh fe “find money” me still a search fe dat deh tree

Me yet fe find smaddy up inna di great house weh look like me…

Not di colour…but me STORY

Cause only den can unu really help poor people

When unu really undastan bout presha!

KNOCK KNOCK

Mama –Nana

Ama Ata Aidoo

Mama-Nana

Barbara Christian

Mamma –Mama Tsitsi I call upon you

Wash us wid African watas and remind us what to do

Is the “Englishness  you say mek dem figet Shona

Now  “Englishness”  and dem figet Patois

Hacksent pan ebbry ting, yuh daughtas lose dem mind

Nobody wah look like “LUCIA”  even similar to your kind

An wid all di book learning-dem figet fe plant corn

So in New Kingston, pan back road dem eat outa “BABA’S” hand

I cah find “NYASHA” –she has been ‘silent’ since then

Aiwa-woo Tsiti- you need fe come talk to dem again

The fight you fight mama shall not be in vain

For ‘Jamericans’ Indians , Pakistan ‘women’ shall all seek to gain-

Truth- identity– that we are one

Not defined by ‘society’ or betta yet;  A man

Not a curly hair, nor locks, nor an extra pound should set us apart

For only one color blood set di rhythm in our hearts

So we beat it- against di cake soap, against di size small clothes,-

– against di false nails and extra pointed toes,

We beat it against di long hair dem wah  fi rest pan we back

We beat I like how dem beat d Kongo drum “KNOCK KNOCK!”

KNOCK –KNOCK!

WHO’S there –a group of women taking di baton from “mama’s” past

Yuh daughtas beat di drum , all  inna Carolyn Cooper’s ‘African Diaspora’ class

KNOCK -KNOCK!

 

~~~This piece is really about some great novels I read while studying African Diaspora-Women’s Narrative a course taught by Dr Carolyn Cooper at the University of the West Indies, Mona. It talks about how women have created a voice for themselves through writing. This is one of my many inspirations

“Basic Black”

From a BLACK womb, came a BLACK gem with black pearly eyes

Through these eyes I see my brothers and sisters wrapped in black silk velvet skins, when the sun hits just right these gems shine…

But from the odda day nuh baddi nuh fava..di only ting BLACK is di level a dawkness weh some  we have

black is di 24 inch horse hair weh deh pan sum a we head

black a di placards an tire weh bun inna di middle  di road because all wen we ketch di biigest criminals, my so called sisters shall “black it”

Nuttin aroun me dan a rainbow pan a dry sunny day – dem blue, red, purple, like smaddy decide fe draw di colour wheel

Not to mention when di sun hit dat an it look like di skin start fe peel

Foolishness!

Me jus cah undastan wah so wrong wid just being BLACK …

BLACK is the vision of a blind man

BLACK is the sky without moon or stars

BLACK is the man who fought for his rights but was placed behind bars

BLACK the tears my mother, her mother, her mother mother cried’

So dat you can upload that video on youtube walking around looking like a colour wheel you damn fool

I am BLACK

BLACK..is me

BLACK are the pages of my history

They were..

They are…

I am BLACK

Ugly an falla fashin!

Tap falla backa me!!

Mek u nuff so gal?

If me fly yuh pitch, me kotch yuh itch, yuh jus mek me blood a bwoil

Move man!

Yuh too blasted nuff

hottest ting yuh neven gud lukin..yuh damn teeth dem yellow an yuh foot back tuff

fe smaddy so ugly yuh confident doe! All a walk inna broad day light!

Mi sarry but if I was you..mi wudnt walk til nite

Yuh tan bad enuh! No sah yuh need likkle care!

Not even likkle oil fe plasta yuh bungu brush or buy piece a hair?

But den again… weh d scalp deh fe put it pan! woieee puppa jesas yuh bax dis yah one yah wid yuh lef han

Look yah nuh missis, me ago try ketch me bus …cause me fraid mi tan yah an yuh ugliness go be contagious

me ago ask me chuch sistas fe pray fe yuh! mine shawp me ask di community cause sum family sin mus did mek yuh cum yuh ugly

Fe yuh face shape nuh define yet, google still a wuk pan a software fe dat and dem still a calculate di circumference a yuh head fe try build yuh a hat!

Yuh head big enuh!!! puppa jesaz walk yah so if yuh nuh busy

cum like a young angel bax yuh pawts togedda wen him did feel lazy

woeeeee make a go inna me bus …

See yuh lata ugliness

a gwine put beauty unda u name fe me christmas wish

blasted falla fashin

badmind yuh have …. pan tap a ebbry ting else woieee

no sah make i spin two time before me step inna di bus

Nuh want no duppy falla

oyeee ugly! wen u go dovecot lata say hi to yuh fambily fe me!